တနှစ်ကြာပိတ်ထားခဲ့သော  မလေးရှားအလုပ်သမားစေလွှတ်ခွင့်  ၀န်ကြီးဌာနမှ  ပြန်လည်ခွင့်ပြု


တနှစ်ကြာပိတ်ထားခဲ့သော မလေးရှားအလုပ်သမားစေလွှတ်ခွင့်ကို ၀န်ကြီးဌာနမှ ပြန်လည်ခွင့်ပြုခဲ့ကြောင်း ဖေဖော်ဝါရီလ ၇ ရက်နေ့ရက်စွဲပါ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အလုပ်သမားညွှန်ကြားမှုဦးစီးဌာန၏ ထုတ်ပြန်ကြေညာချက်အရ သိရသည်။


မလေးရှားသို့ အလုပ်သမားစေလွှတ်လိုသည့် ပြည်ပအလုပ်အကိုင်အကျိုးဆောင်လိုင်စဉ်ရ အေဂျင်စီများအနေဖြင့် စေလွှတ်မည့်အလုပ်သမားများအပေါ် တာဝန်ယူမှုနှင့် ကာကွယ်စောင့်ရှောက်ပေးနိုင်မှု၊ မိသားစုလွှဲပို့ငွေ တရားဝင်ပေးပို့နိုင်မှု၊ သတ်မှတ်ဝန်ဆောင်စရိတ်နှုန်းထက် လျှော့ချပေးနိုင်မှုများ ဆောင်ရွက်ပေးရမည်ဟု သိရသည်။ မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့ချုပ် (MOEAF)မှလည်း ၀န်ကြီးဌာန၏ လမ်းညွှန်မှုများကို အေဂျင်စီများလိုက်နာဆောင်ရွက်စေရန် ညွှန်ကြားဆောင်ရွက်သွားမည်ဟု သိရသည်။


''ကျွန်တော်တို့အနေနဲ့ကတော့ ပြန်လည်ခွင့်ပြုပေးခဲ့တဲ့အတွက် ၀န်ကြီးဌာကို ကျေးဇူးအရမ်းတင်ပါတယ်။ မြန်မာလုပ်သားတွေအများဆုံးသွားရောက်လုပ်ကိုင်နေတဲ့နေရတခုလည်းဖြစ်တယ်။ ၀န်ကြီးဌာနက တောင်းဆိုတာတွေကို အကုန်လိုက်နာသွားမှာပါ။ အစကတည်းက ၀န်ဆောင်စရိတ်ကို အေဂျင်စီတွေကနေပြီး အစိုးရသတ်မှတ်ထားတာထက် လျှော့ယူနေတာပါ။ အစိုးရက မလေးရှားကို အလုပ်သမား ၀န်ဆောင်စရိတ် အဖြစ် ကန်ဒေါ်လာ ၈၅၀+၂၂၅၀၀ ကျပ်သတ်မှတ်ထားတာ အေဂျင်စီအများစုကတော့ ဒေါ်လာ ၇၀၀/ ၇၅၀/၈၀၀ ၀န်ဆောင်စရိတ်အဖြစ် ယူကြတာများတယ်''ဟု (MOEAF) ဒုဥက္ကဋ္ဌ ဦးရန်နိုင်စိုးက ပြောသည်။


လက်ရှိတွင် မလေးရှားနိုင်ငံမှ ၀န်ဆောင်မှုလုပ်ငန်း(စားသောက်ဆိုင်၊ ဟိုတယ် အစရှိသောလုပ်ငန်းများ)၊ ဆောက်လုပ်ရေးလုပ်ငန်း၊ စက်ရုံအလုပ်ရုံလုပ်ငန်း၊ စိုက်ပျိုးရေးလုပ်ငန်းများအတွက် လုပ်သားများ အဓိကခေါ်ယူလျက်ရှိပြီး မြန်မာနိုင်ငံမှ သွားရောက်လိုသည့် အလုပ်သမားများ အနေဖြင့် လိုင်စဉ်ရအေဂျင်စီများထံတွင် လျှောက်ထားနိုင်ကြောင်း၊ မလေးစကားသည် မခက်ခဲသည့်အပြင် အကြွေးစနစ် ဖြင့် သွားရောက်နိုင်ခြင်း၊ အချို့သော လုပ်ငန်းများအနေဖြင့် ၀န်ဆောင်စရိတ် အခမဲ့ခေါ်ယူ ခြင်းများလည်းရှိကြောင်း ၎င်းက ဆက်လက်ပြောကြားခဲ့သည်။


မလေးရှားနိုင်ငံသို့ အလုပ်သမား တရားဝင်စေလွှတ်လျက်ရှိသည့် အေဂျင်စီ ၁၅၀ ကျော်ရှိကြောင်း အလုပ်သမားများ လုံခြုံရေးအတွက် မလေးရှားနိုင်ငံတွင် call center  ပြန်လည်ဖွင့်လှစ်နိုင်ရန် စီစဉ် ဆောင်ရွက်နေကြောင်း သိရသည်။


မလေးရှားနိုင်ငံသို့ အလုပ်သမားစေလွှတ်ခွင့်ကို အလုပ်သမားလူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ ၂၀၁၆ ခုနှစ်၊ ဒီဇင်ဘာလ ၆ ရက်နေ့တွင် ယာယီရပ်ဆိုင်းခဲ့သည်။      


ကျော်ကျော်