လုံးခင်း၊ ဖားကန့်ရတနာမြေရှိကုမ္ပဏီအချို့ လုပ်ခွင့်သက်တမ်းကုန်နေသော်လည်း ဆက်လက်တူးဖော်နေ


ကချင်ပြည်နယ်၊ ဖားကန့်မြို့နယ် လုံးခင်း၊ ဖားကန့်ရတနာမြေရှိ တူးဖော်ခွင့်သက်တမ်းကုန်ဆုံးနေသည့် ကျောက်မျက်လုပ်ကွက်များတွင် ကုမ္ပဏီအချို့က တူးဖော်မှုများ ဆက်လက်ပြုလုပ်နေကြောင်း ဒေသခံ များထံမှ သိရှိရသည်။


လုံးခင်း၊ ဖားကန့်ရတနာမြေရှိ ကုမ္ပဏီ ၅၁ ခု၏ ကျောက်မျက်လုပ်ကွက် ၂၃၄ ခုသည် ယခု ဖေဖော် ၀ါရီလအတွင်း သက်တမ်းကုန်ဆုံးမည်ဖြစ်ပြီး ဖေဖော် ၀ါရီ ၁ ရက်မှ ၈ ရက်အထိ ကုမ္ပဏီ ၂၇ ၏ ကျောက် မျက်လုပ်ကွက် ၁၅၀ သက်တမ်း ကုန်ဆုံးသွားသော်လည်း ဆက်လက်တူးဖော်မှုများ ပြုလုပ်နေကြသည့် အတွက် သယံဇာတနှင့် ပတ်ဝန်းကျင်ထိန်းသိမ်းရေး ၀န်ကြီးဌာနအနေဖြင့် အချိန်မီအရေးယူဆောင်ရွက် စေချင်ကြောင်း ဒေသခံများက ပြောသည်။


''ဒီကိစ္စတွေကို ကျွန်တော်တို့ လွှတ်တော်ကိုယ်စားလှယ်တွေက လုပ်လို့မရဘူး။ ၀န်ကြီးဌာနက လုပ်ရမှာ။ ၀န်ကြီးဌာနက အိပ်ပျော်နေလို့ ခဏခဏနှိုးနေရတယ်။ ၀န်ကြီးနဲ့တွေ့တိုင်း ဒီကိစ္စကို ကျွန်တော် ပြောပါတယ်'' ဟု ဖားကန့်မြို့နယ် ပြည်သူ့လွှတ်တော်ကိုယ်စားလှယ် ဦးတင့်စိုးက News Watch သို့ ပြောသည်။ ကချင်ပြည်နယ် ဖားကန့်ဒေသတွင် လုပ်ကွက် ဧရိယာဧက ၃၅,၀၀၀ ရှိပြီး ယခင်အစိုးရလက်ထက် ၂၀၁၆ ခုနှစ် နှစ်စတွင် လိုင်စင်ပေါင်း ၂၀,၀၀၀ ကျော်ချထားပေးခဲ့ရာ ကာလတိုအတွင်း ကြီးမားသည့် စက်ယန္တရားများသုံးပြီး အတင်းအဓမ္မထုတ်ယူခဲ့ကြောင်း၊ အမျိုးသားလွှတ်တော်သယံဇာတနှင့် ပတ်ဝန်းကျင်ထိန်းသိမ်းရေး ကော်မတီဝင် ဦးထွန်းထွန်းဦးထံမှ သိရှိရသည်။


မြန်မာနိုင်ငံမှထွက်ရှိသည့် ကျောက်စိမ်းအားလုံးနီးပါးကို တရုတ်နိုင်ငံသို့ ရောင်းချခြင်းဖြစ်ရာ ၂၀၁၄ ခုနှစ် တရုတ်နိုင်ငံ၏ သွင်းကုန်စာရင်းများအရ မြန်မာနိုင်ငံမှ တရားဝင်တင်သွင်းသည့် ကျောက်စိမ်းတန်ဖိုးသည် ကန်ဒေါ်လာ ၁၂ ဒသမ ၃ ဘီလီယံရှိသည်ဟု သိရှိရသည်။


ဖားကန့်ဒေသ ကျောက်စိမ်းတူးဖော်ရေးကို ကုမ္ပဏီ ၁၁၀၀ ကျော်က လုပ်ကွက် ၂၄၀၀ ကျော် လုပ်ကိုင်ခွင့်ရထားကြောင်း ကချင်ပြည်နယ်အစိုးရ၏ စာရင်းများအရ သိရှိရသည်။


ဇော်မိုးထက်