မြို့ပြအမွေအနှစ် အဆောက်အအုံများကို ခွင့်ပြုချက်မရှိဘဲ မူလပုံစံပျက်ယွင်းအောင် လုပ်ဆောင်ပါက အမြင့်ဆုံးဒဏ်ငွေ သိန်း ၅၀ (သို့မဟုတ်) ထောင်ဒဏ် ၅ နှစ် ချမှတ်မည်

ဆူးလေဘုရားလမ်းရှိ သမိုင်းဝင်အဆောင်အဦးတခု။


ရန်ကုန်မြို့တော်စည်ပင်သာယာ နယ်နိမိတ်အတွင်းရှိ မြို့ပြအမွေအနှစ် အဆောက်အအုံများကို ကော်မတီ၏ခွင့်ပြုချက်မရှိဘဲ မူလပုံစံပျက်ယွင်းစေရန် ပြင်ဆင်ခြင်း၊ ဖြိုဖျက်ခြင်း၊ ရွှေ့ပြောင်းခြင်းများ ပြုလုပ်ပါက အမြင့်ဆုံးဒဏ်ငွေသိန်း ၅၀ (သို့မဟုတ်) ထောင်ဒဏ် ၅ နှစ် ချမှတ်မည်ဖြစ်ကြောင်း အသစ်ပြန်လည်ပြင်ဆင်ရေး ဆွဲထားသည့် ၂၀၁၈ ခုနှစ် ရန်ကုန်မြို့တော်စည်ပင်သာယာရေးဥပဒေကြမ်း၏ 'သမိုင်းဝင်အဆောက်အအုံများအပါအ၀င် မြို့ပြမွေအနှစ် အဆောက်အအုံများ ပြစ်မှုနှင့်ပြစ်ဒဏ်များ အခန်း' ပုဒ်မ ၃၇၇(က)တွင် ဖော်ပြပါရှိသည်။


မြို့တော်နယ်နိမိတ်အတွင်းရှိ မြို့ပြအမွေအနှစ် အဆောက်အအုံကို ကော်မတီ၏ ခွင့်ပြုချက်မရှိဘဲ မူလပုံစံ ပျက်ယွင်းစေရန်ပြင်ဆင်ခြင်း၊ ဖြိုဖျက်ခြင်း၊ ရွှေ့ပြောင်းခြင်းပြုလုပ်လျှင် ငွေဒဏ်ကျပ် ၁၀ သိန်းမှ ကျပ်သိန်း ၅၀ ထိ ဖြစ်စေ၊ ထောင်ဒဏ် ၃ နှစ်မှ ၅ နှစ်ထိဖြစ်စေ၊ ဒဏ်နှစ်ရပ်စလုံး ဖြစ်စေချမှတ်ရမည်ဟု ယင်းပုဒ်မ ၃၇၇(က) တွင် ဖော်ပြပါရှိသည်။ အဆိုပါဥပဒေကြမ်းကို လွှတ်တော်မှ အတည်ပြုနိုင်ရေးအတွက် ကိုယ်စားလှယ်များ ဆွေးနွေးရန်ကျန်ရှိနေပြီး ဥပဒေကြမ်းနှင့်ပတ်သက်၍ အများပြည်သူတို့၏ အကြံပြုချက်များကို ရန်ကုန်တိုင်း ဒေသကြီးအစိုးရအဖွဲ့မှ တောင်းခံထားသည်။


ယင်းအပြင် ပုဒ်မ ၃၇၇(ခ)တွင် မြို့တော်နယ်နိမိတ်အတွင်းရှိ မြို့ပြအမွေအနှစ် အဆောက်အအုံဖြစ်ကြောင်း (သို့မဟုတ်) အမွေအနှစ်နယ်မြေဖြစ်ကြောင်း အများပြည်သူသိရှိရန် တပ်ဆင်ထားသော ကြော်ငြာ ဆိုင်းဘုတ်များ၊ ခြံစည်းရိုးအကာအရံများ စသည်တို့ကို ဖြုတ်ခြင်း၊ ဖျက်ဆီးခြင်း၊ ရွှေ့ပြောင်းခြင်းတို့ပြုလုပ်ပါက ငွေဒဏ်ကျပ် ၃ သိန်းမှ ကျပ် ၁၅ သိန်းထိဖြစ်စေ၊ ထောင်ဒဏ် ၆ လမှ ၁ နှစ်ထိဖြစ်စေ၊ ဒဏ်နှစ်ရပ်စလုံးဖြစ်စေ ချမှတ်ရမည်ဟု ဖော်ပြပါရှိသည်။


အလားတူ ပုဒ်မ ၃၇၇(ဂ)တွင်လည်း မြို့တော်နယ်နိမိတ်အတွင်းရှိ မြို့ပြအမွေအနှစ် အဆောက်အအုံတည်ရှိရာ နယ်မြေအဖြစ် သတ်မှတ်ပြဋ္ဌာန်းထားသော နယ်နိမိတ်အတွင်း ကျူးကျော်ဝင်ရောက်နေထိုင်ခြင်း၊ ကော်မတီ၏ ခွင့်ပြုချက်မရှိဘဲ လုပ်ငန်းတခုခုလုပ်ကိုင်ခြင်းများ ကျူးလွန်ပါက ငွေဒဏ်ကျပ် ၁ သိန်းဖြစ်စေ၊ ထောင်ဒဏ် ၆ လဖြစ်စေ၊ ဒဏ်နှစ်ရပ်စလုံးဖြစ်စေ ချမှတ်ရမည်ဟု ဖော်ပြပါရှိသည်။


ရန်ကုန်မြို့တော်စည်ပင်သာယာရေးကော်မတီက ဗိုလ်ချုပ်အောင်ဆန်းဈေး၊ မီးရထားရုံးချုပ်၊ စိန်ဂျွန်းကက် သလစ်ဘုရားရှိခိုးကျောင်း၊ မဟာသိမ်တော်ကြီး၊ မြို့တော်ခန်းမအပါအ၀င် သမိုင်းဝင်အဆောက်အအုံ ၆၀ ကျော် စာရင်းများကို အများပြည်သူလေ့လာကြည့်ရှုနိုင်စေရန် မြို့တော်ခန်းမရှေ့နှင့်  ဆူးလေဘုရားဝန်းကျင်တွင် စိုက်ထူပြသထားသည်။        


လင်းလင်းအောင်