တရားဥပဒေစိုးမိုးရေးကို နှီးဖြင့်ထိုးသွားကြသော ထမင်းဝအောင်စားထား တီရှပ်များ


တရားလွှတ်တော်ရှေ့နေကြီးဦးကိုနီ လုပ်ကြံသတ်ဖြတ်ခံရသည့်အမှုကို စစ်ဆေးနေသည့် ရုံးချိန်း ၁၂-၁-၂၀၁၈ တခုတွင် ဖြစ်ပါသည်။ တရားခံဟု သတ်မှတ်ခံထားရသူများက တရားလိုရှေ့နေများနှင့် သတင်းမီဒီယာများအား ''မင်းတို့ ထမင်းဝအောင်စားထား''ဟု ပြောသွားသည်ဆို၏။ ထိုသို့ ပြောဆိုခဲ့သည်ဆိုသောစကားသည် သတင်းမီဒီယာများထက်သို့ ရောက်ရှိလာခဲ့ရာ အများပြည်သူတို့အကြား အလွန်ဂယက်ရိုက်သွားခဲ့သည်။ ထိုစကားသည် တရားရုံးတော်ကို မထီမဲ့မြင်ပြုရာရောက်ကြောင်း၊  တရားဥပဒေစိုးမိုးရေးကို ခြိမ်းခြောက်မှု တခုဖြစ်ကြောင်း အများပြည်သူတို့က လူမှုကွန်ရက်စာမျက်နှာများပေါ်မှ  ပြင်းပြင်းထန်ထန် ဝေဖန်ခဲ့ကြသည်။ ကာတွန်းဆရာ များကလည်း ကာတွန်းရေးဆွဲကာ ထောက်ပြဝေဖန်ခဲ့ ကြသည်။ မြန်မာမီဒီယာ ရှေ့နေများကွန်ရက်ဥက္ကဋ္ဌ ဖြစ်သူ တရားလွှတ်တော်ရှေ့နေဦးအောင်စိုးကလည်း ''မြန်မာစကားမှာ ထမင်းဝအောင်စားထားဆိုတာဟာ သတ်ပစ်မယ်လို့ ခြိမ်းခြောက်တာပဲ''ဟု အတိအလင်း ထုတ်ဖော်ပြော ကြားခဲ့သည်။ သို့သော် ဆိုင်ရာပိုင်ရာပုဂ္ဂိုလ်များက ထိုစကားသည် ခြိမ်းခြောက်သည့် စကားမဟုတ်ပါဟု ကာကာဖေးဖေး၊ ဖာဖာထေးထေးလုပ်ခဲ့သည်ကိုလည်း ကြားသိခဲ့ရသည် ။


မြန်မာစာမြန်မာစကားအသုံးအနှုန်းတွင် 'ထမင်း'ဆိုသည်ကို အသက်၊ ကျေးဇူးတရားတို့အား တင်စားသုံးနှုန်း တတ်ကြပါသည်။ အနုပညာရှင်များ၊ အထူးသဖြင့် သဘင်၊ ဂီတ၊ ရုပ်ရှင်နယ်ပယ်မှ အနုပညာရှင်များသည် သူတို့၏ပရိသတ်အား 'ထမင်းရှင်'များဟု တင်စားကာ လေးစားဂါရ၀ပြုကြပါသည်။ 'မိဘပြည်သူများက ထမင်းကျွေးထားတာပါ'ဟု တလေးတစား ပြောဆိုလေ့ရှိကြပါသည်။ ထိုစကားမှာ အမှန်တကယ် ထမင်းပွဲရှေ့ရောက် ခူးခပ်ပြင်ဆင်၍ ကျွေးမွေးသည်ကို ဆိုလိုခြင်းမဟုတ် လူထုပရိသတ်က အားပေးကြသဖြင့် နာမည်တလုံးရသည်။ အောင်မြင်မှုရသည်။ ထိုအောင်မြင်မှုကြောင့် မိမိတို့၏ အသက်မွေးဝမ်းကျောင်းမှု ပြည့်စုံခြင်းဖြစ်ရသည်ဟုဆိုလိုခြင်းဟု လူတိုင်းသဘောပေါက်ကြ၏။  'ထမင်းအိုးကွဲချင်ပြီလား'ဆိုသည့် စကားလုံးမှာ 'ပြည်သူတွေ အချစ်ပျက်အောင်၊ အမုန်းအမျက်သိုအောင် လုပ်သည်လား'ဟု ဆိုလိုသည်ကိုလည်း လူတိုင်းနားလည်ကြပါ၏။  


ထို့အတူပင် 'ထမင်းဝအောင်စားထား'ဟူသည့် စကားလုံးသည် မည်သည့်အဓိပ္ပာယ်ဆောင်သည် ဆိုသည်ကို စာတတ်သူတိုင်း သိနားလည်ကြပါသည်။ ယင်းသည် မကြာခင် 'သတ်မည်၊ သေစေမည်'ဟု ခြိမ်းခြောက်ခြင်းပင် ဖြစ်၏။ ခင်ဦးစားငချစ်ညိုက ဦးအောင်ဇေယျ(အလောင်းမင်းတရား)နှင့် မြင်းတစီးချင်း၊ လှံတစင်းချင်း စီးချင်းထိုးမည်ဟုလာသောအခါ အလောင်းမင်းတရားဘက်မှ ထွက်လာသည့် တပ်ဗိုလ်တပ်မင်းတို့အား ငချစ်ညိုက“'နင်ထမင်းမုန်းပြီလား'ဟု ဆိုခဲ့၏။ သို့ဆိုသောစကားသည် ခေါက်ဆွဲကြော်၊ ကြာဆံကြော်စားမည် လောဟု လောကွတ်ပျူငှာလုပ်ခြင်းမဟုတ်၊ သေချင်ပြီလားဟု ခြိမ်းခြောက်မောင်းမဲငေါက်ငမ်းသော စကားဖြစ်သည်ဆိုသည်ကို လူလိုနားလည်သူတိုင်း သိကြပါသည်။ သို့စင်လျက် 'ထမင်းဝအောင်စားထား' ဟူသော စကားသည် ခြိမ်းခြောက်ခြင်းမဟုတ်ဟု ကာဖေးကြ၊ ဖာထေးကြ သူတို့၏ ဉာဏ်ပညာမှာ အံ့သြဖွယ်ရှိလှသည်။ သို့သော်စကားဆိုသည်မှာ မသိ၍၊ တွေဝေမိုက်မဲ၍၊ ဒေါသမောဟဖြင့် ပြောမိသည်များလည်း ရှိတတ်သည်ကြောင့် ထိုအကြောင်းကို လျစ်လျူရှုထားခဲ့၏။


နောက်တပတ် ဖေဖော်ဝါရီလ ၂ ရက်နေ့ ရုံးချိန်းတွင်တော့ ထိုစကားသည် စကားအဖြစ်မျှသာ မဟုတ်တော့ဘဲ၊ ခြိမ်းခြောက်သည့် လှုပ်ရှားမှု၊ လှုံ့ဆော်မှု (campaign)တခုဖြစ်လာခဲ့သည်။ ထိုအမှု၏ 'မင်းတို့ထမင်းဝအောင် စားထား' ဟူသည့် စာတန်းနှင့် လက်ညှိုးငေါက်ငေါက်ထိုးထားသည့် ပုံတို့ကို ရိုက်နှိပ်ထားသည့် တီရှပ်အင်္ကျီတို့ကို ၀တ်ဆင်ထားသူ လေးဦးက တရားရုံးသို့ ရောက်လာခဲ့ကြသည်။ ဦးကိုနီအား လုပ်ကြံသတ်ဖြတ်မှုဖြင့် တရားရင်ဆိုင်နေရသူတို့အား ထိုစာတန်းနှင့်ပုံရိုက်နှိပ်ထားသည့်တီရှပ်များကို လက်ဆောင်အဖြစ် ပေးအပ်ခဲ့ကြသည်။


သူတို့၏ပြောစကားများအရ 'လူသတ်တရားခံကြည်လင်းကို လေးစားသဖြင့် လာရောက်ဝန်းရံခြင်းဖြစ်သည်'ဟု သိရ၏။ ကလေးငယ်တဦးကို ပွေ့ချီ ချော့မြူနေသည့် အသက်ခြောက်ဆယ်ကျော်အရွယ် လူတဦးကို သူရဲဘောကြောင်လှစွာ နောက်ကျောဘက်မှနေ၍ ဦးခေါင်းကို သေနတ်ဖြင့် ပစ်ခတ်သတ်ဖြတ်ခဲ့သည့် လူသတ်သမားအား လေးစားသည်ဟု သူတို့က ဆိုကြသည်။


ဘုရားရှင်အား လုပ်ကြံသူ၊ အဇာတသတ် အား ပိတုဃာတက ကံကြီးထိုက်အောင် မြှောက်ထိုးပင့်ကော် လုပ်ခဲ့သူ ဒေ၀ဒတ်ကိုပင် ဆရာတဆူမှတ်၍ ကိုးကွယ်ပူဇော်သူများရှိခဲ့ပေသေးရာ 'ဘုရားခိုးမှုဖြင့် ထောင်ကျခဲ့ဖူးသူ လူသတ်သမား'ကို သူရဲကောင်းအဖြစ် လေးစားသူများလည်း ရှိကောင်းရှိမည်မှာ ဓမ္မတာပင်ဖြစ်၏။ ယင်းကားကိစ္စမရှိ။“'သာမဏေန သမဏော၊  ဂေါဏေနဂေါ ဏော'သာ ဖြစ်၏။


တရားရုံးပရိဝုဏ်အတွင်းသို့ 'မင်းတို့ ထမင်းဝအောင်စားထား' ဟူသည့်စာတန်းနှင့် လက်ညှိုးထိုး ရုပ်ပုံပါ တီရှပ်များဝတ်ဆင်လာခြင်း၊ ထိုတီရှပ်တို့ကို လူသတ်သမားအား လက်ဆောင်အဖြစ် ပေးအပ်ခဲ့ခြင်းသည်ကား ကိစ္စရှိလာ၏။ ထိုစကားသည် တစုံတယောက်၏ အသက်အန္တရာယ်ကို ခြိမ်းခြောက်သည့် စကားဖြစ်သည် ဆိုခြင်းကို လူတိုင်းနားလည်ကြ၏။ ယင်းသည် မည်သူ့ကို ရည်ညွှန်းခြင်းဖြစ်သနည်း၊ အမှုလိုက်တရား လိုရှေ့နေများကို ခြိမ်းခြောက်ရာ မရောက်သလော။ တရားလိုပြသက်သေများကို ခြိမ်းခြောက်ခြင်းမမည် သလော။ အမှုကို စီရင်ဆုံးဖြတ်ရမည့် တရားသူကြီးများကို ခြိမ်းခြောက်ရာ မကျပြီလော။


ယင်းလုပ်ရပ်သည် တရားဥပဒေစိုးမိုးရေးကို လိုလားတောင်းဆိုနေကြသည့် အများပြည်သူတို့ကို ခြိမ်းခြောက်ရာမရောက်ပြီလော။ ယင်းသည် တရားမျှတမှုကိုလိုလားသည့် လူ့အဖွဲ့အစည်းကို ခြိမ်းခြောက်ရာ မရောက်ပြီလော။  တရားရုံးတော်ကိုမထီမဲ့မြင်ပြုရာမရောက်ပြီလော။ တရားမျှတမှုနှင့် တရားဥပဒေစိုးမိုးမှုကို ပေါ်ပေါ်ထင်ထင် စိန်ခေါ်ရာမရောက်သလော။  တရားသူကြီးများနှင့်တကွ တရားဥပဒေစိုးမိုးရေးကို ကိုင်တွယ် ဆောင်ရွက်နေရသည့်သက်ဆိုင်ရာ တာဝန်ရှိပုဂ္ဂိုလ်များ၏ ဆင်ခြင်တုံတရားကို မေးခွန်းထုတ်ရပေတော့မည်။


ထိုကိစ္စနှင့်ပတ်သက်၍ မြန်မာနိုင်ငံရှေ့နေများ အသင်းဥက္ကဋ္ဌ တရားလွှတ်တော်ရှေ့နေဦးစိန်ဝင်းက ''ဒါဟာ လွတ်လပ်တဲ့ တရားစီရင်ရေးကို တနည်းမဟုတ် တနည်းထိပါးနေတယ်''လို့ ထုတ်ဖော်ပြောဆိုခဲ့သည်။ ''တရားစီရင်ရေးကို တိမ်းစောင်းစေမယ့် အရေးအသား၊ အမူအရာ၊ အပြုအမူတွေဟာ အရေးယူ ခံထိုက်တယ်'' လို့လည်း သူကဆက်လက် ပြောဆိုခဲ့သည်။ မြန်မာမီဒီယာရှေ့နေများကွန်ရက်ဥက္ကဋ္ဌ တရားလွှတ်တော်ရှေ့နေ ဦးအောင်စိုးကလည်း ''တရားဥပဒေ စိုးမိုးရေးကို ဘယ်လောက်ပဲပြောနေနေ အခုဒီလို ဥပဒေနဲ့မညီတဲ့ကိစ္စတွေ ဟာ တရားရုံး ပရိဝုဏ်ထဲမှာပဲ ဖြစ်သွားတာ။ တရားဥပဒေအရ အရေးယူနိုင်တဲ့အဖွဲ့အစည်းတွေကြားမှာ ဖြစ်သွားတာ။ တိုင်းပြည်အတွက် နစ်နာဆုံးရှုံးတယ်။ အဲဒီအဆောက်အအုံထဲက နောက်ပိုင်းတရားခွင်ထဲကို ရောက်မလာနိုင်ဘူးလို့ ဘယ်သူမှ ပြောလို့မရဘူး''ဟု ထုတ်ဖော်ပြောကြားခဲ့သည်။


ထိုအရေးကိစ္စနှင့်ပတ်သက်၍ မြန်မာနိုင်ငံရှေ့နေများအသင်း၊ လွတ်လပ်သောရှေ့နေများအသင်း၊ ရန်ကုန်ရှေ့နေအသင်း၊ မြန်မာမီဒီယာရှေ့နေများကွန်ရက်၊ မြန်မာနိုင်ငံရှေ့နေများကွန်ရက်၊ ဥပဒေဘွဲ့ရသူများ အသင်းစသည်တို့က ၂၀၁၈ ခုနှစ် ဖေဖော်ဝါရီလ ၄ ရက်နေ့တွင် ရန်ကုန်တိုင်းဒေသကြီး၊ ကျောက်တံတားမြို့ နယ်၊ မဟာဗန္ဓုလလမ်းရှိ ရန်ကုန်ရှေ့နေအသင်းရုံးတွင် အစည်းအဝေးတခုကျင်းပပြု လုပ်ခဲ့ကြပြီးနောက် ထိုနေ့ရက်စွဲပါကြေညာချက် တစောင်ကို လက်မှတ်ရေးထိုးထုတ်ပြန်ကြေညာခဲ့သည်။ ထိုကြေညာချက်တွင် ''ဦးကိုနီနှင့် ကိုနေ၀င်းအား ရက်စက်စွာလုပ်ကြံသတ်ဖြတ်ခဲ့သည်ကို မည်သည့်တရားဥပဒေနှင့် ဘာသာတရား ကမျှ ခွင့်မပြုသောလူသတ်မှုကို ထောက်ခံအားပေးသည်၊ ထိုလူသတ်ခြင်းသည် မှန်ကန်သည်ဟု အများပြည်သူသိအောင် မီဒီယာမှတဆင့်ပြောဆိုခဲ့ပြီး 'ထမင်းဝအောင်စားထား' စာတန်းပါသော အင်္ကျီများဝတ်ဆင်၍ အသင့်ယူဆောင်လာကာ စွပ်စွဲခံရသူ လူသတ်တရားခံကြည်လင်းနှင့်အပေါင်းအပါ တို့အား လက်ဆောင်ပေးခြင်းများပြုလုပ်ခဲ့ကြောင်း သိရှိရပါသည်။ ထိုသို့ --- ပြုမူချက်မှာ လူသတ်မှုကို တရားရုံးရှေ့တွင် ပြောင်ပြောင်တင်းတင်း အားပေးခြင်း၊ လှုံ့ဆော်ခြင်း၊ ဖိအားပေးခြင်းများဖြစ်၍ ဖွဲ့စည်းပုံ အခြေခံဥပဒေပုဒ်မ (၁၉-က)ပါ လွတ်လပ်စွာ တရားစီရင်ရေးကို အနှောင့်အယှက်အဟန့်အတား ပြုရာရောက်၍ ကျွန်ုပ်တို့ကန့်ကွက်သည်။ ထိုသို့ပြုမူချက်သည် မှန်ကန်စွာစီရင်ရမည့် တရားစီရင်ရေးလမ်းကြောင်းအား တိမ်းစောင်းစေခြင်း၊ တရားဥပဒေစိုးမိုးရေးကိုပျက်ပြားစေခြင်း၊ ပြည်သူလူထုအကြား ပဋိပက္ခကိုဖော်ဆောင် ခြင်း၊ အမှုတွင် စီရင်ဆုံးဖြတ်ရမည့် ခုံရုံးအဖွဲ့တရားသူကြီး(၃)ပါး၊ ဥပဒေအရာရှိ၊ တရားလိုဘက်ဆိုင်ရာ အမှုလိုက်ရှေ့နေများနှင့် လာရောက်ထွက်ဆိုမည့်သက်သေများကို မလျော်သြဇာအင်အားပြ ပြုလုပ်ရာ ရောက်ပြီး တိုင်းပြည်မငြိမ်မသက်ဖြစ်စေရန် အစီအစဉ်ရှိရှိ ကြံစည်လုပ်ဆောင်ရာရောက်၍ ကျွန်ုပ်တို့အားလုံးက ရှုတ်ချကန့်ကွက်ကြောင်းနှင့် သက်ဆိုင်ရာတာဝန်ရှိသူများက ဥပဒေနှင့်အညီ ထိရောက်စွာ အရေးယူဆောင် ရွက်ပေးပါရန် အလေးအနက်တောင်းဆိုကြောင်း အများသိစေရန် ကြေညာအပ်ပါသည်''ဟု ဖော်ပြပါရှိသည်ကို တွေ့ရပါသည်။ ထိုစာပါဖော်ပြချက်တို့မှာ အလွန်ရှင်းလင်းလှသည်ဖြစ်၍ အထူးတလည် အကျယ်ချဲ့ အနက်ဖွင့်ရန် မလိုပြီ။


အသိဉာဏ်ပညာပြည့်စုံသော လူယဉ်ကျေးတို့ အသိုင်းအ၀ိုင်းတွင် လူအချင်းချင်းသတ်ဖြတ်မှုကို အလွန်ရွံရှာစက်ဆုပ်ကြပါသည်။ ရှေးယခင်ကဆိုလျှင် လူသတ်မှုကျူးလွန်သူတို့အားလည်း ပြင်းထန်စွာ ပြစ်ဒဏ်ပေးခဲ့ကြသည်။ ဘေဘီလုံဧကရာဇ်ဟာမူရာဘီ၏ ကိုဓဥပဒေ (Hammurabi’s Code) တွင် မျက်လုံး တလုံးအတွက် မျက်လုံးတလုံး(An eye for an eye) ဟု ဥပဒေပညတ်ခဲ့သည်။ လူသတ်မှုအတွက် သေစား သေစေပြစ်ဒဏ်ချမှတ်ခဲ့သည်။


နောက်ပိုင်းခေတ်တို့ တွင်လည်း နိုင်ငံတိုင်းလိုလိုတွင် လူသတ်မှုကျူးလွန်သူများကို သေစားသေစေရန် ဥပဒေပြဋ္ဌာန်းကာ ကြိုးစင်တင်၍ သေဒဏ်ပေးခြင်း၊ လျှပ်စစ်ကုလားထိုင်တွင်တင်ကာ သေဒဏ်ပေးခြင်း၊ ဆေးထိုး၍ သေဒဏ်ပေးခြင်း စသည်တို့ကို ပြုခဲ့ကြပါသည်။


လူသတ်မှုကျူးလွန်သူတို့အား သေဒဏ်ပေးသည်ဆိုသည့် ရည်ရွယ်ချက်မှာ သူ့အားသတ်လျှင်  အသက်ဖြင့် ပြစ်မှုကြွေးကို ပြန်လည်ပေးဆပ်ရမည်ဟု လူ့အသိုင်းအ၀ိုင်းကို သင်ခန်းစာပေးခြင်းဖြစ်သည်။ နောက်နောင် လူသတ်မှုများ ထပ်မံမပေါ်ပေါက်စေရန် ဟန့်တားခြင်းဖြစ်၏။ သို့ရာတွင် ပို၍ပို၍ယဉ်ကျေးသော အဆင့်မြင့် သော လူ့အသိုင်းအ၀ိုင်းကို တည်ဆောက် လာနိုင်သည့်အခါတွင်ကား လူသတ်မှုကျူးလွန်သူအား သေဒဏ် ပေးခြင်းကိုပင် ရှောင်ကြဉ်၍လာကြပါသည်။ ပြစ်မှုကျူးလွန်သူအား နောင်တရခွင့် ပြင်ဆင်နိုင်ခွင့်ပေးရန် လိုအပ်သည်ဟု စဉ်းစားတွေးခေါ်လာကြကာ (နိုင်ငံများစွာတွင်) သေဒဏ်ပေးခြင်းကို ပယ်ဖျက်ခဲ့ကြပါသည်။ သေဒဏ်အစား တသက်တကျွန်းပြစ်ဒဏ်၊ ထောင်ဒဏ်အနှစ်နှစ်ဆယ်စသည်ဖြင့် ပြင်ဆင်သတ် မှတ်လာကြ ပါသည်။


ထိုအချက်ကိုထောက်၍ ယဉ်ကျေးသော လူ့အသိုင်းအ၀ိုင်းသည် လူတယောက်၏အသက်အား သတ်ဖြတ်ခြင်းကို မည်သည့်အကြောင်းပြချက်နှင့်မျှ မလိုလားကြ၊ လူတယောက်အား သတ်ဖြတ်ခြင်းကို ဥပဒေနှင့်အညီ တရားစီရင်၍ သတ်ဖြတ်ခြင်းကိုပင် အလိုမရှိကြ၊ အားမပေးကြ၊ မထောက်ခံကြဆိုသည်ကို ပညာဉာဏ်နှင့် ဆင်ခြင်သိမြင်နိုင်ကြပါလိမ့်မည်။


လူသတ်သမားအား ထောက်ခံအားပေးခြင်းသည် အလားတူနောက်ထပ်လူသတ်သမားများ ပေါ်ပေါက် လာစေရန် နောက်ထပ်လူသတ်မှုများ ထပ်မံပေါ်ပေါက်စေရန် အားပေး၊ တိုက်တွန်း၊ လှုံ့ဆော်ခြင်းပင်ဖြစ် ပါသည်။ ယင်းသည် အေးချမ်းစွာနေထိုင်လိုကြသော လူ့အသိုင်းအ၀ိုင်းအား ကြီးစွာခြိမ်းခြောက်ခြင်းပင်ဖြစ် ပါသည်။ သက်ဆိုင်ရာတာဝန်ရှိသူတို့အနေဖြင့် ထိုအပြုအမူတို့အား မသိကျိုးကျွန်ပြုနေကြလျှင် ၎င်းတို့သည် လည်း လူ့အသိုင်းအ၀ိုင်းအား ခြိမ်းခြောက်သူများနှင့် အလိုတူအလိုပါဟုပင် ဆိုရပါလိမ့်မည်။


မည်သည့်နိုင်ငံ၊ မည်သည့်တရားဥပဒေကမျှ လူအချင်းချင်းအနိုင်အထက်ပြုခြင်း၊ နှိပ်စက်ညှဉ်းပန်းခြင်း၊ သတ်ဖြတ်ခြင်းကို ခွင့်မပြုပါ။ လူသတ်ခြင်းကို အားပေးခြင်း၊ ကူညီခြင်း၊ ထောက်ခံခြင်းတို့ကို ခွင့်မပြုပါ။ သို့စင်လျက် လူသတ်သမားကိုလေးစားသည်၊ ထောက်ခံသည်၊ အားပေးသည်ဟူသည့် လုပ်ရပ်တို့ကို တရားရုံး ဥပစာတွင် ပြောင်ပြောင်တင်းတင်းပြုလုပ်လာကြခြင်းမှာ တရားဥပဒေစိုးမိုးရေးကို မထီမဲ့ မြင်ပြုရာရောက်ပါ သည်။ တရားဥပဒေစိုးမိုးမှုကို ထိန်းသိမ်းစောင့်ရှောက်နေသူများအား ထိပါးစော်ကားရာ ရောက်ပါသည်။ တရားဥပဒေအား သေးသိမ်စေရန် ပြုကျင့်ရာရောက်ပါသည်။ တနည်းအားဖြင့်ဆိုရသော် ထိုသို့ 'မင်းတို့ ထမင်းဝအောင်စားထား'ဟူသည့် စာတန်းနှင့် လက်ညှိုးထိုးရုပ်ပုံပါ တီရှပ်များဝတ်ဆင်ကာ တရားရုံး ပရိဝုဏ်အတွင်းသို့ ၀င်ရောက်လာကြသူများ၊ ထိုတီရှပ်တို့ကို လူသတ်သမားအားလက်ဆောင်အဖြစ်ပေး အပ်ကာ ထိုသူတို့အား ထောက်ခံကြောင်း ပြသပြုမူခဲ့ကြသူများသည် တရားဥပဒေစိုးမိုးရေး၏မျက်နှာကို နှီးဖြင့်ထိုးသွား၊ ရိုက်သွားကြသူများဟုပင် ဆိုရပါလိမ့်မည်။ နှီးဟူသည်မှာ ၀ါးရင်းတုတ်မဟုတ်၍ ဖူးရောင်ကွဲပြဲသွေးထွက်သံယိုတော့ မဖြစ်နိုင်ပါ။ (အခန့်မသင့်လျှင်တော့ မျက်စိမျက်ဆံကန်းတတ်ပါ၏)။ ယင်းသို့ နှီးဖြင့် အထိုးအရိုက်ခံရသည်ကို ခံကောင်းသည်ထင်၍ ခံနိုင်သူက ခံနေကြစေကာမူ အများပြည်သူ တို့အတွက်မူ အလွန်စပ်ဖျဉ်းဖျဉ်းနိုင်လှ၊ ခံရခက်လှပါသည်။ သို့ဖြစ်၍ ဤစာကိုရေးရပါသည်။ ငါးပိကောင်၊ ငါးခြောက်သည်တို့က အိပ်ကောင်းနေစဉ်တွင် ဆားသည်တို့က ခွေးမောင်းပေးနေရသည်မှာ သိပ်တော့မဟန်လှ ကြောင်း မောင်းကွဲကြီးထုလိုက်ရ ပါတော့သည်။


ထင်လင်းဦး


(Wisdom Villa)