ပျော်ဘွယ်(သို့မဟုတ်)ဆံပင်မြို့တော်


ဆံပင်လုပ်ငန်းတခုတည်းဖြင့် ကျပ်သိန်းပေါင်းသောင်းနှင့်ချီ၍ ချမ်းသာသွားသူများရှိသည်ဟု တစုံတယောက်က သင့်အားပြောလာပါက ရုတ်တရက်ယုံကြည်ရန် ခက်ခဲပါလိမ့်မည်။ သို့သော် မန္တလေးတိုင်းဒေသကြီး ပျော်ဘွယ်မြို့နယ်တွင် ဆံပင်လုပ်ငန်းကြောင့် ချမ်းသာသွားကြသူများ ယခင်ကတည်းကရှိခဲ့သလို ယခုလည်း ရှိနေဆဲဖြစ်သည်။


ကမ္ဘာပေါ်ရှိနိုင်ငံများက ရေနံကို ရွှေမည်းဟု တင်စားခေါ်ဝေါ်ကြသကဲ့သို့ ပျော်ဘွယ်မြို့နယ်ရှိ ပြည်သူများအတွက် ဆံပင်သည်ရွှေမည်းဖြစ်သည်။ ဆံပင်ကြောင့် အလုပ်အကိုင်အခွင့်အလမ်း ပေါများလာသည်။ စီးပွားရေးပိုမိုအဆင်ပြေလာနေကြသည်။ ထို့ကြောင့်ဆံပင်သည် သူတို့အတွက်တော့ ရွှေမည်း။

ပျော်ဘွယ်မြို့ကို မြန်မာသက္ကရာဇ် ၁၁၈၆ ခုနှစ် ဘကြီးတော်မင်းလက်ထက် ညောင်ရမ်းမင်းသား၏ ရင်ခွင်ပိုက်အုပ်ထိန်းသူ သီရိဝဏ္ဏဘွဲ့ခံ ဦးမှုံက တည်ခဲ့ခြင်းဖြစ်သည်။ စိုက်ပျိုးရေး၊ မွေးမြူရေးနှင့် သီးနှံပွဲရုံ လုပ်ငန်းများသည် မြို့နယ်၏အဓိကစီးပွားရေးဖြစ်ခဲ့သော်လည်း ယခုအခါ ဆံပင်လုပ်ငန်းသည်လည်း အဓိက စီးပွားရေးလုပ်ငန်းတခု ဖြစ်လာခဲ့သည်။


ပျော်ဘွယ်ကို ဆံပင်လုပ်ငန်းအကြောင်း မိတ်ဆက်စတင်ခဲ့သူများမှာ တရုတ်လူမျိုးများဖြစ်ကြပြီး လွန်ခဲ့သည့် ၁၅ နှစ်ခန့်မှစ၍ ဆံပင်လုပ်ငန်းဖွံ့ဖြိုးလာခဲ့ကြောင်း ဒေသခံများထံမှ သိရှိရသည်။


''တရုတ်တွေ စပြီးတော့လုပ်တာ။ သူတို့လုပ်တာကိုကြည့်ရင်းနဲ့ ဒေသခံတွေလည်း လုပ်တတ်လာတာ။ မပင်ပန်းဘဲနဲ့ ပိုက်ဆံရကြတော့ လူတိုင်းနီးပါး အခုဆိုဆံပင်ပဲလုပ်ကြတော့တယ်''ဟု ဒေသခံတဦး ဖြစ်သည့် ကိုမြင့်ဇော်က ပြောသည်။


ပျော်ဘွယ်မြို့နယ်ထဲက အိမ်ရှင်မတွေအနေနဲ့ ဆံပင်အရှုပ် ၅ ကျပ်သားပါ အထုပ်တထုပ်ကို ဖြေခအနေနဲ့ ၁၂၀၀ ကျပ်ရရှိပြီး ထမင်းအိုးတည်၊ ကလေးထိန်း၊ အိမ်မှုကိစ္စတွေလုပ်ရင်းနဲ့ တနေ့ကို အထုပ် ၃ ထုပ်လောက် ဖြေလို့ပြီးတယ်လို့ ပျော်ဘွယ်မြို့နယ် ကျီနီကျေးရွာရှိ အိမ်ရှင်မအချို့ထံမှ သိရှိရသည်။


ဆံပင်လုပ်ငန်းအတွက် အဓိကလိုအပ်သည့် ဆံပင်အရှုပ်များ (အကျွတ်များ)သည် ဘင်္ဂလားဒေ့ရှ် နိုင်ငံနှင့် အိန္ဒိယနိုင်ငံတို့မှ ၀င်ရောက်လျက်ရှိပြီး မြန်မာဆံပင်များလောက် ဈေးကောင်းမရဟုဆိုသည်။ လက်ရှိအချိန် တွင် မြန်မာဆံပင်အကျွတ် ၁ ပိဿာလျှင် ကျပ်တသိန်းခုနစ်သောင်းဝန်းကျင်ရှိပြီး ဘင်္ဂလားဒေ့ရ်ှနှင့် အိန္ဒိယမှ ဆံဆပင်များမှာ ၁ ပိဿာ တသိန်းနှစ်သောင်းဝန်းကျင်ရှိနေကြောင်း ဆံပင်ဈေးကွက်အတွင်းမှ သိရှိရသည်။


''ကုန်ကြမ်းအများစုက ဘင်္ဂလားဒေ့ရ်ှနဲ့ အိန္ဒိယကနေလာတယ်။ သူတို့ဆီကနေ လေယာဉ်နဲ့ စစ်တွေ ကိုရောက်တယ်။ စစ်တွေကနေတဆင့် မြန်မာပြည်ထဲကိုသွင်းတယ်။ မြန်မာဆံပင်က ဆံလုံးကောင်းတယ်။ ဘင်္ဂလားဒေ့ရ်ှတို့၊ အိန္ဒိယတို့က ဆံပင်က ဆံလုံးမကောင်းဘူး။ ဒီရောက်တော့ အဲဒါတွေကိုရောနှောပြီး တရုတ်ပြည်ကိုပို့တယ်''ဟု ဆံပင်လုပ်ငန်းလုပ်သက် ၁၅ နှစ်ရှိပြီဖြစ်သည့် မသန္တာက ဆံပင်ဈေးကွက် အကြောင်း ရှင်းပြသည်။


ဆံပင်လုပ်ငန်းတွင် ကုန်ကြမ်းအဖြစ်မှ ရောင်းတန်းဝင်ဆံပင်အဖြစ်သို့ ရောက်ရှိရန် အဆင့် ၇ ဆင့်ကို ဖြတ်သန်းရသည်။ ပထမဦးစွာ ဆံပင်အရှုပ်(အကျွတ်)များကို တပင်ချင်းဖြစ်အောင် ရှင်းလင်းရတယ်။ ထို့နောက် ရရှိလာသည့် ဆံပင်အရွယ်အစားပေါ်မူတည် ၍ ၆ လက်မ၊ ၉ လက်မ၊ ၁၂ လက်မ အစရှိသဖြင့် အမျိုးအစားခွဲခြား၍ ပေါင်းဆေးဖြင့်ပေါင်းကာ တရုတ်နိုင်ငံသို့ တင်ပို့လျက်ရှိသည်။


တရုတ်နိုင်ငံသည် မြန်မာအပါအ၀င် အရှေ့တောင်အာရှနိုင်ငံများမှ ဆံပင်များကိုဝယ်ယူရန် ဆံပင် အတုများပြုလုပ်ကာ ကမ္ဘာပေါ်တွင် ဆံပင်နှင့်ပတ်သက်သော ထုတ်ကုန်များကို အများဆုံးတင်ပို့နေသည့် နိုင်ငံအဖြစ် ရပ်တည်နေသည်။


တရုတ်နိုင်ငံမှ တန်ဖိုးမြင့်ဆံပင်တုများသည် အမေရိက၊ အာဖရိကနှင့် ဥရောပတို့တွင် ဈေးကောင်း ရနေသည်။


ကမ္ဘာ့ကုန်သွယ်ရေးအဖွဲ့ (WTO) ၏ စာရင်း များအရ တရုတ်နိုင်ငံသည် ကမ္ဘာပေါ်တွင် ဆံပင်တု၊ အမွေး၊ အတောင်၊ ပန်းတုများကို အများဆုံးတင်ပို့နေသည်ဟု သိရှိရသည်။


တရုတ်နိုင်ငံသို့ တင်ပို့နေသည့် ဆံပင်ဈေးနှုန်း များကို အတိအကျမသိရသော်လည်း ဆံပင်အရှုပ်ဈေးထက် ၄ ဆ ၅ ဆခန့် ပိုမိုရရှိနိုင်ကြောင်း ဆံပင်ရောင်းချသူအချို့ထံမှ သိရှိရသည်။


မြန်မာနိုင်ငံက ဆံပင်များကို တရုတ်နိုင်ငံသို့ အဓိကတင်ပို့နေပြီး တရုတ်နှစ်သစ်ကူး ကျင်းပသည့် အချိန်တွင်သာ အရောင်းအ၀ယ်အေးတတ်ကြောင်း ၎င်းကပြောသည်။


 

''တရုတ်နှစ်ကူးချိန်ကျရင် ဒီမှာရှိတဲ့ တရုတ်တွေက တရုတ်ပြည်ကို ပြန်ကြတယ်။ ပြန်တဲ့အခါကျတော့ ဒီမှာရှိတဲ့ သူတို့ရုံးတွေကို ပိတ်ခဲ့တာကိုး။ ဟိုဘက်က တရုတ်တွေကလည်း အဲဒီရက်မှာ အ၀ယ်ရပ်ထားတာမျိုး တွေရှိတယ်။ ကျန်တဲ့အချိန်ကျတော့ နေ့စဉ်ဈေးကွက်ရှိပါတယ်''ဟု ပျော်ဘွယ်မြို့ရှိ အင်ပါယာ ဆံပင် ရောင်းဝယ်ရေးလုပ်ငန်း၏ မန်နေဂျာဖြစ်သူ ကိုသိန်းဇော်ထံမှ သိရသည်။


လုပ်ငန်းကျွမ်းကျင်မှုအပေါ် မူတည်၍ ဆံပင် အလုပ်သမားတဦးလျှင် တနေ့ကျပ်ငါးထောင်၊ ကျပ် ရှစ်ထောင်၊ ကျပ်တသောင်းခွဲနှင့် ကျပ်နှစ်သောင်းအထိ ၀င်ငွေရရှိနေကြသည်။


ပျော်ဘွယ်မြို့နယ်တွင် အလုပ်သမား ၅၀ နှင့် အထက်ရှိသည့် ဆံပင်ရုံပေါင်း ၅၀ ကျော်ရှိပြီး အလုပ် သမား ၅၀ အောက် လုပ်ငန်းများမှာ ၃၀၀ နီးပါးရှိကြောင်း ပျော်ဘွယ်မြို့နယ် စည်ပင်သာယာရေးကော် မတီထံမှ သိရသည်။


သို့သော် ပြည်ထဲရေးဝန်ကြီးဌာန အထွေထွေအုပ်ချုပ်ရေးဦးစီးဌာနက ၂၀၁၇ ခုနှစ် အောက်တိုဘာလအတွင်း ထုတ်ပြန်သော ပျော်ဘွယ်မြို့နယ်ရှိ စက်မှုလုပ်ငန်းများစာရင်းတွင် ချည်မျှင်စက်ရုံ၊ ရေသန့်စက်ရုံ၊ စက်ချုပ် လုပ်ငန်း၊ ပန်းထိမ်လုပ်ငန်း၊ ပန်းပဲလုပ်ငန်း၊ မုန့်လုပ်ငန်းနှင့် အုန်းဆံကြိုးလုပ်ငန်းများကိုသာ ဖော်ပြထားပြီး ဆံပင်လုပ်ငန်းအကြောင်း ထည့်သွင်းဖော်ပြ မထားသည်ကို တွေ့ရှိရသည်။


ဆံပင်လုပ်ငန်းသည် ပျော်ဘွယ်မြို့နယ်သူ မြို့နယ်သားများကို အကျိုးပြုနေသော်လည်း အနံ့အသက်ပေါင်းစုံ ပါဝင်သည့် ဆံပင်များကို နေ့စဉ်ကိုင်တွယ်ထိတွေ့နေရသဖြင့် ရေရှည်တွင် ကျန်းမာရေးထိခိုက်လာမည်ကို စိုးရိမ်သူများလည်း ရှိသည်။


ဆံပင်လုပ်ငန်းပိုင်ရှင်များက နှာခေါင်းစည်းများ ယခင်က တပ်ပေးသော်လည်း အလုပ်သမားအများစု မတပ်ချင်သောကြောင့် လက်ရှိအချိန်တွင် နှာခေါင်းစည်းမတပ်ဘဲ လုပ်ငန်းခွင်ဝင်နေကြသည်ကို မြင်တွေ့ခဲ့ရသည်။


''အစကတော့ ကျန်းမာရေးထိခိုက်မယ်ဆိုပြီး ကြောက်တာပေါ့နော်။ ဒါပေမဲ့ ကိုယ့်ရှေ့မှာ လုပ်နေတဲ့ သူတွေလည်း ဘာမှမဖြစ်ဘဲ အလုပ်လုပ်နေကြတော့ မစိုးရိမ်တော့ပါဘူး''ဟု ဆံပင်လုပ်ငန်းတွင် နေ့စဉ် ၀င်ရောက်လုပ်ကိုင်နေသူ အသက် ၂၅ နှစ်အရွယ်ရှိ မယုဇနက ပြောသည်။


ယခင်က မုန့်ကြွပ်ကြောင့် လူသိများခဲ့သော ပျော်ဘွယ်သည် ယခုအခါ ဆံပင်မြို့တော် ဖြစ်လာခဲ့ပါပြီ။


နှင်းမောင်ဦး