ရေမဆေးတို့ရဲ့ ထွက်ရပ်လမ်းနဲ့ သေတွင်းနှုတ်ခမ်းဝမှ ထမင်းတလုတ်


မြန်မာကျပ်ငွေ သိန်းပေါင်း တသောင်းနီးပါးတန်သော စွန့်ပစ်မြေစာတင်ကားကြီးပေါ်မှ စွန့်ပစ်မြေစာများကို ဝေါခနဲသွန်ချလိုက်သောအသံသည် ရေမဆေးလုပ်သားများအတွက် လောပန်းဖြစ်ရေးအိပ်မက်အတွက် အချက်ပေးခေါင်းလောင်းသံဖြစ်သည်။ ထိုဝေါခနဲဆိုသော အသံကြီးနှင့်အတူ မရဏမင်းသည် ထက်ကြပ်မကွာ ပါလာနေသည်ကို လောပန်းဖြစ်ရေး အိပ်မက်နှင့်တ၀မ်းတခါးအတွက် စားဝတ်နေရေး အဆင်ပြေချင်လှသော လောဘများကြောင့် အကြောက်တရားများက မေ့လျော့အမှောင်ဖုံးခဲ့ကြရတော့သည်။


ဖားကန့်ကျောက်စိမ်းတွင်းဒေသတွင် ကျောက်စိမ်းတွင်းများမှ စွန့်ပစ်မြေစာပုံပြိုကျမှုကြောင့် သေဆုံးခဲ့ရသည့် ရေမဆေး လုပ်သားပေါင်း ဆယ်ဂဏန်းမှ ရာဂဏန်းထိရှိနေပြီဖြစ်သည်။ ၂၀၁၅ ခုနှစ် နိုဝင်ဘာလတွင် ဖြစ်ပွားခဲ့ သော ကံခါစွန့်ပစ်မြေစာပုံပြိုကြမှုကြောင့် ရေမဆေးလုပ်သားပေါင်း ရာနှင့်ချီဆုံးခဲ့သော်လည်း လူသေ အလောင်းပေါင်း ၁၁၄ လောင်းသာရှာတွေ့ခဲ့သည်။ ဖြစ်ပွားသည့်နေရာတွင် အသက်ရှင်ကျန်ရစ်သူများ၏ ပြောစကားအရ မြေစာပုံအောက်တွင် မြေပိ၍နစ်မြုပ်သေဆုံးနေသော အလောင်းပေါင်းရာနှင့်ချီ ကျန်ရှိနေနိုင် သေးသည်ဟု ဆိုကြသည်။ သို့ရာတွင် မည်၍မည်မျှ သေဆုံးခဲ့သည်ကို သက်ဆိုင်ရာဌာနများမှ စာရင်းအတိ အကျထုတ်ပြန်နိုင်ခြင်း မရှိခဲ့ပေ။ ထိုသတင်းသည် ကမ္ဘာ့သတင်းမီဒီယာစာမျက်နှာများပေါ်တွင် ဟိုးလေး တကျော်ကျော်ဖြစ်ခဲ့သည်။


ကျောက်စိမ်းတူးဖော်မှုကြောင့် သဘာဝပတ်ဝန်းကျင်ပျက်စီးခြင်း၊ ကျောက်စိမ်းလုပ်ငန်နှင့် ပတ်သက်သော လုပ်သားပေါင်းများစွာ နှစ်စဉ်သေဆုံးနေခြင်း၊ သဘာဝဘေးအန္တရာယ်များ နှစ်စဉ်ကြုံတွေ့ခံစားနေရခြင်းများ ဖြစ်ပေါ်လျက်ရှိသည်။ ထိုကိစ္စများကို အစိုးရအဆက်ဆက်မှ လက်ရှိအစိုးရအထိ ကိုင်တွယ်ဖြေရှင်းနိုင်ခြင်း မရှိသေးသည်ကို တွေ့ရသည်။ ယနေ့ချိန်ထိ  ရေမဆေးလုပ်သားများ မြေစာပြိုကျမှုကြောင့် သေဆုံးနေရဆဲ ဖြစ်သည်။ ထိုကဲ့သို့ ဖြစ်စဉ်များ နောက်ထပ်မဖြစ်ပွားရလေအောင် သက်ဆိုင်ရာဌာနအပါအ၀င် မည်သည့် အစိုးရဌာနကမှ ကြိုတင်ပြင်ဆင်မှု၊ ညှိနှိုင်းဆောင်ရွက်မှု၊ ပူးပေါင်းအဖြေရှာမှုများ မရှိသည်ကို တွေ့ရသည်။


ဤဖြစ်ရပ်များသည် တနှစ်လည်းမဟုတ် နှစ်နှစ်လည်းမဟုတ်၊ တခါလည်းမက နှစ်ခါလည်းမက၊ သေဆုံးမှု တွေက တရာသီလည်းမက၊ နှစ်ရာသီလည်းမက ကျောက်စိမ်းတွင်းဒေသ၏ ပြည်သူများသေဆုံးမှုနှုန်း ယနေ့ ချိန်အထိ ရပ်တန့်မသွားသည့်အပြင် စံချိန်ပင်တင်လာခဲ့သည်။ ကြာလာတော့လည်း မြေစာပုံပြိုကျမှုကြောင့် လူသေဆုံးမှုဖြစ်စဉ်များသည် ဖြစ်နေကျဖြစ်စဉ်တခုသဖွယ်ဖြစ်နေပြီး အလေးထားဂရုမူမှုပင်နည်း လာသည်ကို တွေ့လာရသည်။ ဇန်န၀ါရီ ၄ ရက် ညနေ ၃း၁၀ နာရီတွင် ဖားကန့်မြို့နယ် မော်မောင်းဘွမ်ကျေးရွာရှိ ဂျိတ်လန်း (Jade Land)  ကျောက်စိမ်းတူး ဖော်ရေးကုမ္ပဏီ၏ ကျောက်စိမ်းကမ်းပါးနှင့် စွန့်ပစ်မြေ စာပုံဟောင်းပြိုကျမှု ကြောင့် ရေမဆေးလုပ်သား ၆ ဦးသေဆုံးခဲ့ပြီး တဦးဒဏ်ရာရှိခဲ့သည်။ ဇန်န၀ါရီ ၆ ရက် နံနက် ၃း၃၀ နာရီချိန် တွင် ဝှေခါကျေးရွာရှိ ကျောက်စိမ်းတူးဖော်ရေးကုမ္ပဏီတခု၏ ကျောက်စိမ်းကမ်းပါးပြိုကျမှုကြောင့် အဆိုပါ နေရာတွင် ရေမဆေးကျောက်ရှာဖွေသူ ၅ ဦးသေဆုံးခဲ့ပြီး တဦးဒဏ်ရာရရှိခဲ့သည်။ ဇန်န၀ါရီ ၁၁ ရက် နံနက် ၉း၄၅ ချိန်တွင် ဖားကန့်မြို့နယ် ဆိပ်မူကျေးရွာအုပ်စု ဆိုင်းအောင်ရပ်ကွက်အပိုင် နမ့်မှော်ကျေးရွာအနီး ရတနာစမ်းရွှင်ကျောက်စိမ်းတူးဖော်ရေးကုမ္ပဏီမှ စွန့်ပစ်သောမြေစာပုံပြိုကျမှုကြောင့် ယင်းနေရာတွင် ရေမဆေး ကျောက်ရှာဖွေသူ ရေမဆေးလုပ်သား ၄ ဦးသေဆုံးခဲ့ပါသည်။  ၂၀၁၈ ဇန်န၀ါရီလ ၁၁ ရက်အတွင်း ကမ်းပါးပြို ကျမှုနှင့် စွန့်ပစ်မြေစာပြိုကျမှုသုံးကြိမ်ဖြစ်ပွားခဲ့ပြီး ရေမဆေးလုပ်သားပေါင်း ၁၅ ဦးသေဆုံးခဲ့ရသည်။ ၁၁ ရက် အတွင်းမှာ သုံးကြိမ်မြေပြိုခဲ့သည်မှာ ကျောက်စိမ်းတွင်းဒေသတွင် မရှိသလောက်ရှားပါသည်။


မြေစာပုံများ၊ လုပ်ကွက်ကမ်းပါးများ မကြာခဏပြိုကျရခြင်းသည် ကျောက်စိမ်းတူးဖော်ရေးကုမ္ပဏီများမှ ဥပဒေ၊ နည်းဥပဒေများနှင့်အညီ လုပ်ကိုင်ခြင်းမရှိသောကြောင့် အဓိကဖြစ်ပွားရခြင်းဖြစ်သည်ဟု ဒေသခံပြည်သူ အများစုက ပြောနေကြပါသည်။ ကျောက်စိမ်းတူးဖော်ရေးကုမ္ပဏီများမှလည်း ရေမဆေးများဝင် ရောက်မှုတွေ များပြားနေခြင်းကြောင့် လုပ်ငန်းများလုပ်ဆောင်ရာတွင် နှောင့်နှေးကြန့်ကြာခြင်း၊ ရာသီဥတုဖောက်ပြန်၍ မိုးသည်းထန်စွာရွာသွန်းမှုများ၊ နိုင်ငံတော်မှ စွန့်ပစ်မြေစာများသွန်ရန် နေရာချထားပေးမှုလုံလောက်စွာ မရရှိခြင်း များကြောင့် လုပ်ငန်းများကို ဆောင်ရွက်ရာတွင် ဥပဒေ၊ နည်းဥပဒေပါ စည်းကမ်းချက်များအတိုင်း ဆောင်ရွက်၍ မရသည်များလည်း ရှိသည်ဟု ကျောက်စိမ်းတူးဖော်ရေးလုပ်ငန်းရှင်များက ဆိုပါသည်။


ကျောက်စိမ်းတူးဖော်ရေးကုမ္ပဏီများအား ပြည်နယ်သယံဇာတ၀န်ကြီးဌာနအနေဖြင့် ဥပဒေလုပ်ထုံး လုပ်နည်းများနှင့်အညီ လုပ်ကိုင်ရန် ညွှန်ကြားထားပြီးဖြစ်သည်ဟု သိရသည်။ ''လုံးခင်းကျောက်စိမ်းတူးဖော် ရေးဌာနမှ တင်ပြထားတာမရှိတဲ့အတွက် ကျွန်တော်လှမ်းတောင်းတယ်ဗျ။ နောက်ပြီး စွန့်ပစ်မြေစာပုံတွေ ကိုလည်း အန္တရာယ်ကင်းအောင် ဆောင်ရွက်ဖို့လည်း ညွှန်ကြားထားတယ်။ အနည်းဆုံးလျှောစောက်ကို အမြင့်ပေ ၃၀ နဲ့ ၆၀ကြားမှာ လုပ်ဖို့လည်း ညွှန်ကြားထားတယ်''ဟု ကချင်ပြည်နယ် သယံဇာတ၀န်ကြီး ဦးလှအောင်က ပြောပါသည်။ ဥပဒေများကို လိုက်နာဆောင်ရွက်ခြင်းမရှိသည့် ကုမ္ပဏီများအား ထိထိရောက် ရောက် အရေးယူဆောင်ရွက်ခြင်း မရှိဟုလည်း ဒေသနေပြည်သူများက ပြောဆိုနေကြပါသည်။


ဖားကန့်ကျောက်စိမ်းတွင်းဒေသတွင် စွန့်ပစ်မြေစာပြိုကျမှုကြောင့် လူပေါင်းများစွာသေဆုံးနေခဲ့သည် မှာ ၂၀၁၀ နောက်ပိုင်းတွင် သိသိသာသာမြင့်တက်လာခဲ့သည်ကို တွေ့ရသည်။ ၂၀၁၅ ခုနှစ် နိုဝင်ဘာလတွင် ဆိပ်မူကျေးရွာအုပ်စု ဆွတ်အောင်ကျေးရွာအနီး ကံခါစုပေါင်းစွန့်ပစ် မြေစာပုံပြိုကျမှုကြောင့် လူပေါင်း ရာကျော် သေဆုံးခဲ့ရသည်။ မြေစာပိသေဆုံးသူအလောင်းပေါင်း ၁၁၄ လောင်းသာ ဖော်ယူနိုင်ခဲ့ပြီး အလောင်းပေါင်း များစွာ ဖော်ယူနိုင်ခဲ့ခြင်းမရှိဟု ဒေသခံများက ပြောသည်။ ထိုနှစ်တွင် မြေစုပုံပြိုကျမှုနှင့် လုပ်ကွက်ကမ်းပါး ပြိုကျမှု (၄၁) ကြိမ်ဖြစ်ခဲ့ပြီး မြေပိသေဆုံးသူ ရေမဆေးလုပ်သားအလောင်းပေါင်း ၂၀၀ ထက် မနည်းကိုသာ အလောင်းဖော်ယူနိုင်ခဲ့သည်ဟု ဖားကန့်မြို့နယ်ရဲစခန်း၏ တရားဝင်ရဲမှတ်တမ်းများအရ သိရပါသည်။ ၂၀၁၆ ခုနှစ်တွင်လည်း မြေစာပုံပြိုခြင်း၊ လုပ်ကွက်ကမ်းပါးပြိုခြင်းများကြောင့် ရေမဆေးလုပ်သားပေါင်း ၅၀ ဦးကျော် သေဆုံးခဲ့သည်ဟု သိရပါသည်။


၂၀၁၇ ခုနှစ်တွင် ကျောက်စိမ်းလုပ်ကွက်ကမ်းပါးပြို၍ ရေမဆေးကျောက်ရှာဖွေသူ ၇၄ ဦးသေဆုံးပြီး ၅၂ ဦး ဒဏ်ရာရရှိခဲ့ပါသည်။ မြေကမ်းပါးယံမှ ပြုတ်ကျသေဆုံးသူပေါင်း ၇ ဦးနှင့် ဒဏ်ရာရရှိသူ ၁၂ ဦး ရှိခဲ့ပါသည်။ ယာဉ်တိုက်မိသူနှင့် ဘက်ဟိုးဖြင့် ရိုက်မိ၍ သေဆုံးသူ ၃၂ ဦးနှင့် ဒဏ်ရာရရှိသူ ၂၆ ဦးရှိခဲ့ပြီး လုပ်ကွက်အတွင်း လုံခြုံရေးတပ်ဖွဲ့ဝင်များ၏ ပစ်ခတ်မှုကြောင့် ရေမဆေးလုပ်သား ၇ ဦးသေဆုံးခဲ့ပြီး ၈ ဦးဒဏ်ရာရရှိခဲ့ပါသည်။ ၂၀၁၇ ခုနှစ်တွင် ကျောက်စိမ်းတူးဖော်ရေးလုပ်ငန်းခွင်မှ အလုပ်သမားများနှင့် ရေမဆေးလုပ်သားများ အပါအ၀င် လူပေါင်း ၁၂၀ ဦးသေဆုံးခဲ့ပြီး ၉၈ ဦး ဒဏ်ရာရရှိခဲ့သည်ကို တွေ့ရပါသည်။


ဖားကန့်ကျောက်စိမ်းတွင်းဒေသ ကျောက်စိမ်းတူးဖော်ရေးနှင့်ပတ်သက်သော ဥပဒေများ၊ မူဝါဒများ ပြောင်းလဲသင့်သည်ဟု ဒေသခံများက  ပြောဆိုနေကြပါသည်။ ရေမဆေးကျောက်ရှာဖွေသည့် လုပ်ငန်းလုပ် ကိုင်သူများသည် ကျောက်စိမ်းနှင့်ပတ်သက်သောလုပ်ငန်းများကို တရားဝင်ဂုဏ်သိက္ခာရှိစွာ လုပ်ကိုင်ခွင့်မရ ကြသည့်အတွက် ကျောက်စိမ်းတူးဖော်ရေးကုမ္ပဏီများမှ မလိုချင်၍ စွန့်ပစ်သော ပေပေါင်းရာနှင့်ချီ မြင့်မား မတ်စောက်သော မြေစာပုံများတွင်သာ အသက်စွန့်ပြီး ရှာဖွေနေကြရခြင်းဖြစ်သည်ဟု ရေမဆေးလုပ်ငန်းလုပ် ကိုင်သူများက ပြောဆိုနေကြပါသည်။ တဖန်ကုမ္ပဏီများမှလည်း မြေစာပုံများကို သက်ဆိုင်ရာဌာနများနှင့် လက်ဝါးရိုက်ပြီး ဥပဒေများကိုဖောက်ဖျက်ကာ စည်းကမ်းမဲ့သွန်နေကြသည်ဟု ဆိုပါသည်။


မိုးရာသီကုန် ဆောင်းရာသီနှင့်နွေရာသီများသည် ကျောက်စိမ်းတူးဖော်ရေးလုပ်ငန်းများတက်သုတ် အလုပ်လုပ်သောအချိန်ဖြစ်သည်။ ထိုအချိန်များတွင် နိုင်ငံအနှံ့အနယ်နယ်အရပ်ရပ်မှ တိုင်းရင်းသားပေါင်းစုံ သည် စွန့်ပစ်မြေစာပုံများတွင် ရေမဆေးကျောက်ရှာဖွေရန် ရောက်ရှိလာကြသည်။ မျှော်လင့်ချက်အမျိုးမျိုး ဘ၀ အထွေထွေသော လူကြီး၊ လူငယ်ကျောင်းနေအရွယ် ကလေးငယ်များပါ မြေစာပုံမှာ သေမင်းနှင့် နပန်းလုံး ရင်းငွေရှာရန် နေရာယူလာကြသည်။ ကျောမွဲလူတန်း စား ရေမဆေးသမားတို့၏ ထမင်းတလုတ်သည် မရဏမင်း၏ ပုတ်ချခြင်းကိုသာမက ၀ိညာဉ်များကိုပါ နုတ်ယူသွားတတ်သောကြောင့် တန်ဖိုးကြီးမားလှသည်။ ကျောက်စိမ်းတွင်းဒေသ၏ စွန့်ပစ်မြေစာပုံသည် ကျောမွဲတို့၏ ထွက်ရပ်လမ်းဖြစ်သည်။ လိုတရငွေပဒေသာပင် ကြီးဆိုလျှင်လည်း မမှားပေ။ မြေစာပုံပေါ်မှာ သူဌေးဖြစ်သွားကြသူတွေ အပုံအပင်ရှိသလို မြေစာပုံပေါ်မှာ မူးယစ်ဆေးစွဲသွားကြသူတွေလည်း ဒုနဲ့ဒေးဖြစ်သည်။


မြေစာပုံသည် ကျောမွဲလူတန်းစားတို့အတွက် ကောင်းခြင်း၊ ဆိုးခြင်းများကို ဖန်တီးပေးနိုင်ရုံသာမက အသက် ပေါင်းများစွာ တပြိုင်တည်းနုတ်ယူသွားခဲ့သည်မှာလည်း အကြိမ်ကြိမ်ပင်ဖြစ်သည်။ အစိုးရအနေဖြင့် ဤကိစ္စကို ကိုင်တွယ်ဖြေရှင်းချိန် ကြာမြင့်နေဦးမည်ဆိုလျှင် ရေမဆေးသမားသူဌေးလောင်းများအဖြစ် မြင်တွေ့ရနိုင်ခြင်း ထက် အနာဂတ်မျိုးဆက်သစ်တိုင်းပြည်၏ ခွန်အားအမြောက်အမြားကို စွန့်ပစ်မြေစာပုံများက ၀ါးမျိုသွားဦးမည်မှာ မြေကြီးလက်ခတ်မလွဲဖြစ်ပါကြောင်း တင်ပြလိုက်ရပါသည်။    


ဇော်မိုးထက်(ဖားကန့်)